March 20th, 2006
"Taong Grasa"
Madungis, mabaho, malalim at nanlilisik ang mata, laman lagi ng kalsada, nanginginig sa gutom, wasak-wasak ang damit, nagsasalita mag-isa.
Yan ang mga pangkaraniwang pwede mong matawag sa "Taong Grasa"
Ang mga katulad nya yung madalas mong nakikita sa kalsada. Palaboy laboy at naghahalungkat ng basura para maghanap ng pagkaing ipangtatapal sa gutom na sikmura nila. Ang mga katulad din nya yung iniiwasan mo sa tuwing makakasalubong dahil bukod sa natatakot ka baka manakit, iniiwasan mo ring masingot ang dinakawiwiling amoy na hatid nya. Ang mga katulad nya yung masasabi mong may sariling mundo. Nagsasalita mag-isa. Kinakausap ang sariling paa at bigla-biglang sumisigaw ng
"It hurts, it hurts you know!!"
Na bigla kang mapapalingon na akala mo may nagawa kang kasalanan sa kanya. Sabi nila marami raw dahilan kung bakit nagkaka ganyan ang isang tao. Posible daw sa sobrang hirap ng buhay. sa dami ng problema. Pagkahumaling sa pinagbabawal na gamot. madalas na panonood ng Pinoy Big Brothers. At pagkasawi sa pag-ibig. Sila ang mga taong sarap na sarap sa kalungkutan, at galit na galit sa kaligayahan na halos lahat naman ay 'yon ang inaasam. Masasabi ko na ang mga katulad nila ay parang biktima ng isang sumpa. Sumpa na para sa normal na taong katulad natin ay pagligo lang ang katapat.
Kanina nga lang meron akong napanood sa MTV na kanta ng bandang "Blink 182" Nakalimutan ko lang yung title. Merong part sa mtv ng kantang 'yun yung binihisan nila ng magarang damit yung "Taong Grasa" Dinala sa isang Barber Shop, pinagupitan, pinamanicure, pedicure, pinahawak ng baston sa kanang kamay habang ginagawang pamaypay sa kaliwang kamay naman yung limpak-limpak na salapi at umaastang kagalang-galang.
Nung matapos na yung Ambush Make-over ng "Taong Grasa" na bida doon sa kanta. Nakalimutan nya ang lahat ng kanyang problema at sya'y naging masaya.
Matapos kong panoorin yung kanta na yun sa MTV. Naisip-isip ko baket hindi kya ganun ang gawin ng ibang Official ng Gobyerno kaysa nagra-rally sila para sa problema ng bansa at mapatalsik sa pwesto si Pangulong Gloria Macapagal Arroyo. Bakit hindi nila pagtuunan ng pansin yung mga katulad ng "Taong Grasa" Marami silang nakikitang problema ng bansa, pero yung mga "Taong Grasa" na nasa listahan ng ating problema sa bansa hindi nila nakikita.
Ang sinulat kong ito ay handog ko sa dating kaklase ng kuya ko na ngayon ay "isa" na sa tinutukoy kong "TAONG GRASA"
